2014年2月19日

[盲塞]

________________________________________

阿景
花名叫馬騮王
佢老豆幫佢改嘅
聽講因為腳頭唔好
一出世
就克走老豆份工
所以由細到大
佢老豆一直憎到佢入骨
當佢仇人一樣
仲成日一見就打
實行肉體同精神虐待
絕對無誇張
唔信
可以問吓佢啲屋企人
親朋戚友
或者隔籬鄰舍

諗起都覺得佢慘
從來唔准同枱食飯
新年都無新衫著
唔單止無書讀
仲好少有人同佢玩
屋企雖然有七兄弟姊妹
但都無人敢出聲
心情好的話
或者會暗中保護一下
衰起上蒞
隨時會助紂為虐
佢阿媽周師奶
可能係唯一例外

除咗無啖好食
亦無覺好瞓
夜晚瞓覺
要自己在冷巷行床
就算天寒地凍
被舖都係好單薄
仲要成日提心吊膽
因為佢老豆會隨時突襲
將佢嚇醒
甚至半夜三更趕佢出街
唔俾佢返屋企
返親蒞就棍棒侍候

阿景嘅童年
除咗受罪
簡直係充滿陰影
係人諗起都覺得心寒
佢唔知前世做錯啲乜嘢
今世要俾佢老豆折磨
佢大個之後
因為無受過教育
所以好早就出蒞打工
自己搵食
周圍去捱騾仔

雖然細個時無乜病痛
有無內傷就唔知嘞
可能係先天性遺傳
又或者係後天營養不良
所以好景不長
到三十幾四十歲
有一日
搭地鐵時
因為心臟病
忽然猝死
對佢蒞講
呢件可能係好事
起碼以後都唔駛再受罪

我到依家都唔明白
點解上一代啲人
可以咁盲塞

沒有留言: